Náttúruvá
Eldgos
Mikilvægt er að við tökum fullt mark á viðvörunum sem settar eru fram í tengslum við eldgos þegar þau eru í gangi. Förum ekki inn á svæði sem eru lokuð og látum lögreglu vita ef við vitum um mannaferðir þar.
Jarðskjálftar
Jarðskjálftar verða þegar jarðskorpan brotnar eða hrekkur til. Við höggið sem myndast breiðast jarðskjálftabylgjur út frá brotafletinum. Á vef Veðurstofu Íslands má sjá upplýsingar um jarðskjálfta sem verða á landinu. Flestir jarðskjálftar hérlendis eru það litlir að enginn verður var við þá nema skjálftamælar og því er áhugavert að sjá tíðni þeirra á korti Veðurstofunnar sem er uppfært á 5 mínútna fresti.
Eldingar
Eldingar eru ekki tíðar hér á landi miðað við mörg nágrannalönd okkar. Hér verða þær aðallega samhliða þrumuveðri eða eldgosum. En þegar þær koma er samt full ástæða til að hafa varann á og fylgja varúðarleiðbeiningum.
Flóð
Á hverju ári verða flóð hér á landi. Mismunandi er hvort um ræðir snjó-, sjávar- eða aurflóð. Mikilvægt er að hver og einn sé meðvitaður um um hætturnar á flóðum og leiti upplýsinga um möguleika á þeim eftir veðurfari sem verið hefur eða er spáð.
Óveður
Veður hefur oft áhrif á plön fólks hér á landi. Flestir þekkja vel að vera sífellt að skoða veðurspá og færð og þurfa svo að breyta plönum þar sem ekki er öruggt að vera á ferðinni. Veðurstofan gefur út viðvaranir eftir litum út frá því hversu mikil áhrif veðrið getur haft. Mikilvægt er að taka mark á þeim og gera allt til að koma í veg fyrir tjón og slys.