Bifhjól
Oft er talað um bifhjólafólk sem óvarða vegfarendur þar sem þeir hafa ekki það öryggi sem farþegarými bíls veitir. Í bifhjólaslysum eru því þó nokkrar líkur á alvarlegum meiðslum sér í lagi ef hraði er mikill. Slysarannsóknir sýna að einn af orsakaþáttum slysa er að aðrir vegfarendur átta sig ekki á hraða og fjarlægð mótorhjóls. Það er því mikilvægt að allir temji sér að líta tvisvar og gefa stefnuljós tímalega.
Hlífðarfatnaður mikilvægur
Góður vandaður hlífðarfatnaður hefur margsannað gildi sitt á bifhjólum. Einstaklingur sem dettur á hjóli er mun líklegri á að slasast ef hann er ekki í góðum hlífðarfatnaði með innbyggðum hlífum eða sér hlífum.
Úr vöndu er að velja en samkvæmt Samgöngustofu þá á hlífðarbúnaður bifhjóla að vera CE merktur og uppfylla eftirfarandi staðla eða sambærilega:
- Stígvél - CE EN 13634
- Jakkar, buxur og samfestingar - CE EN 13595
- Bakhlífar - CE EN 1621
- Hanskar - CE EN 13594
- Hlífðargleraugu - CE EN 1938
Gönguskór, íþróttaskór og mokkasíur eru ekki góðir skór á hjóli. Velja þarf stífa leðurskó með innbyggðum hlífum sem uppfylla CE EN 13634 staðalinn.
Mikilvægt er að velja fatnað sem er í áberandi litum. Ef þess er ekki kostur er vesti í skærum lit mikið öryggisatriði þar sem bifhjólamaður í slíku vesti sést mun fyrr og betur en dökkklæddur einstaklingur.
Hjálmur ver það mikilvægasta
Hjálmurinn er líklega sá öryggisbúnaður sem fæst bifhjólafólk sleppir. Mikilvægt er að vanda val hans vel og vera viss um að hann uppfylli ECE 22.05 staðalinn. Nauðsynlegt er að máta hjálm áður en fjárfest er í honum þar sem hjálmur sem passar ekki veitir falska vernd. Líftími hjálma er yfirleitt um fimm ár svo framarlega sem hann hafi ekki orðið fyrir tjóni.
Góð umferðarhegðun gulls ígildi
Gott er að ganga út frá því sem ökumaður bifhjóls að enginn gæti manns betur en maður sjálfur. Ekki borgar sig að treysta um of á aðra ökumenn í umferðinni heldur gefa frekar eftir réttinn. Jafnframt er umferðarhegðunin „líttu tvisvar“ gulls í gildi, sama hver ferðamátinn er.
Misfellur á vegum, vindur, hópakstur og réttur umferðarhraði er eitthvað sem hefur áhrif á öryggi. Hópakstur eykur sýnileika en misfellur og vindur getur orðið til þess að ökumaður missi stjórn á hjólinu. Of mikill hraði eykur svo líkur á slysum til muna. Eins sýna slysatölur það að þeir sem eru á lánshjólum lenda frekar í slysum en aðrir.
Hjólið verður að vera í lagi
Það að tryggja að dekkin, bremsur og ljós séu í lagi auka öryggið til muna. Það getur verið of seint að laga bremsurnar eftir næstu ferð.
Ökuréttindi tekin í ökuskóla
Ökunám fyrir bifhjólapróf er í höndum ökukennara og ökuskóla. Bifhjólaprófin skiptast niður í fjóra flokka sem eru A, A1, A2 og M. Æskilegt er að ökunemi öðlist réttindi fyrir B flokk ökunáms, sem er hið hefðbundna bílpróf á fólksbíl, áður en hann hefur nám fyrir flokk A. Hér má sjá námskrá fyrir bifhjólaréttindi.