Á dögunum gerði VÍS könnun á hjálm­a­notkun 407 hjól­reiða­manna sem voru á ferð­inni á höfuð­borg­ar­svæðinu að morgni dags. Níu af hverjum 10 voru með hjálm sem verður að teljast nokkuð gott hlut­fall. Þetta var áttunda árið í röð þar sem könnun sem þessi hefur verið gerð á sama tíma og Hjólað í vinnuna verk­efnið stendur yfir. Fyrsta árið voru 74% með hjálm þannig að hlut­fall þeirra sem nota hjálm hefur aukist frá þeim tíma þó svo það hafi staðið nokkuð í stað síðustu fimm árin.

Alvar­leg­ustu, en ekki algeng­ustu, hjól­reiða­slysin verða þar sem bíll og hjól lenda saman. Algeng­ustu slysin eru þegar hjól­reiða­maður dettur án þess að annar vegfar­andi komi við sögu. Samkvæmt upplýs­ingum frá Alþjóða heil­brigð­is­stofn­un­inni má rekja 75% bana­slysa hjól­reiða­manna til höfuð­á­verka. Rann­sóknir sýna jafn­framt að hjálmur minnkar líkur á alvar­legum höfuð­á­verkum um allt að 79% og samkvæmt rann­sókn sem var gerð á LSH voru höfuð­meiðsl algengust hjá þeim sem slös­uðust alvar­legast eða 28%.

Hjól­reiðar eru frábær ferða­máti sem stuðlar að bættri lýðheilsu. Örugg­ustu aðstæður þessa hóps eru þar sem mismun­and­i hópar vegfar­enda eru aðskildir og stígar vel sópaðir. Það er ánægju­legt að sjá hversu stór hluti þeirra sem nýta sér hjólið sem ferða­máta velur það að nota hjálm og klæðist skær­litum fatnaði til að auka sýni­leika sinn en þriðj­ungur gerði það í þessari könnun.

Sumarið er sá tími þar sem flestir slasast á hjólum. Núna í maí voru 13 hjól­reiða­slys þar sem lögreglan á höfuð­borg­ar­svæðinu var kölluð til og til LSP leita nærri 600 manns á ári vegna hjól­reiða­slysa. Mikil­vægi þess að fara með gát, tryggja að hjólið sé í lagi og nota örygg­is­búnað verður því seint of oft ítrekað.