Áhafnatrygging
Áhafnatrygging samanstendur af slysatryggingu sjómanna, líftryggingu, tryggingu á eigum skipverja og ábyrgðartryggingu útgerðarmanns.
Slysatrygging og líftrygging eru lögboðnar en við mælum með tryggingu á eigum skipverja og ábyrgðartryggingu til viðbótar svo að eigur og öryggi áhafna sé tryggt eins og best verður á kosið.
Tryggingin bætir
Slysatrygging sjómanna
- Greiddar eru bætur vegna slysa sem verða um borð í skipi og í vinnu í tengslum við rekstur skipsins. Bætur taka mið af siglinga- eða skaðabótalögum eftir því sem fram kemur á skírteini.
Líftrygging
- Greiddar eru bætur ef skipverji veikist um borð í skipi á meðan það er á siglingu og veikindin leiða hann til dauða innan tveggja mánaða.
Trygging á eigum skipverja
- Tjón á eigum skipverja ef þær eyðileggjast við sjóslys eða bruna.
Ábyrgðartrygging útgerðarmanns
- Beint líkams- eða munatjón þriðja aðila vegna skaðabótaábyrgðar sem fellur á tryggingartaka samkvæmt íslenskum lögum.
Tryggingin bætir ekki
Slysatrygging sjómanna
- Ef atburður sem veldur meiðslum á skipverja er ekki skyndilegur og utanaðkomandi.
Líftrygging
- Ef veikindi eru rakin til hryðjuverka vegna hvers konar líffræðilegra eða efnafræðilegra áhrifa og/eða eitrunar, þar með talið vegna sýkla og veira eða þegar afleiðingar veikinda verða meiri vegna framangreindra atriða.
Ábyrgðartrygging útgerðarmanns
- Líkamstjón sem verður við út- eða uppskipun þegar aðrir en áhöfn skipsins vinna verkið.
- Útgjöld vegna læknishjálpar, hjúkrunar, ferðakostnaðar eða útfararkostnaðar samkvæmt sjómannalögum.
- Sektir, málskostnað eða önnur útgjöld í sambandi við refsimál.
- Tjón vegna raka, asbests, PFAS efna eða myglu.
- Tjón sem leiðir af skaðabótaábyrgð sem fellur á útgerðarmann vegna starfsemi í landi.
- Vinsamlegast athugaðu að umfjöllun um trygginguna er ekki tæmandi. Nánari upplýsingar er að finna í skilmála tryggingarinnar.
- Sé ósamræmi milli umfjöllunarinnar og skilmálans þá gildir skilmálinn.
Skilmálar og aðrar upplýsingar
Tryggingaskilmálar eru samningur þinn við VÍS. Mikilvægt er að þú kynnir þér skilmálana vel og áttir þig á því hvað er bætt og hvað er ekki bætt, áður en tryggingin er tekin.
Í upplýsingaskjali er að finna stutta samantekt á helstu þáttum tryggingarinnar. Upplýsingaskjöl eru stöðluð skjöl sem öllum tryggingafélögum ber að birta og auðveldar þannig viðskiptavinum tryggingafélaganna að bera saman tryggingar og sjá hvað þær bæta og bæta ekki.