Fréttasafn
|20.10.2020
Verum undirbúin ef stærri skjálfti verður
Móðir náttúra minnti hressilega á sig í gær með skjálfta upp á 5,6. Sérfræðingar tala um að skjálftahrina geti haldið áfram, jafnvel í einhverja daga. Við hvetjum alla til að auka öryggi sitt og sinna með því að fara vel yfir öryggið á heimilinu ef stærri skjálfti verður.
Forvarnir á heimilinu
Festa skápa og hillur við veggi og/eða gólf.
Hafa þunga hluti, t.d. styttur, ekki ofarlega í hillu.
Festa sjónvörp við borð eða veggi.
Hafa rúm ekki undir gluggum.
Setja öryggisfilmu á gluggarúður þar sem hætta er á að gler fari yfir fólk.
Festa myndir og ljósakrónur í lokaðar lykkjur.
Kynna sér hvar vatnsinntak hússins er og hvernig á að skrúfa fyrir.
Setja öryggislæsingar á skápa til að varna því að brothættir hlutir detti út úr þeim.
Hafa viðlagabúnað eins og sjúkragögn, útvarp með rafhlöðum, vasaljós, teppi, vasahníf, upplýsingar um neyðarnúmerið 112 og aukalykla að bíl, sumarbústað eða öðrum stað sem fjölskyldan hefur aðgang að tiltækan.
Kynn sér hvar næsta fjöldahjálparstöð er.
Viðbrögð við jarðskjálfta
Þegar jarðskjálfti verður er mikilvægt að hver og einn verji sig fyrir slysum. Einkunnarorð þar eru að krjúpa, skýla og halda. Gott getur verið að fara í horn á herbergi eða undir borð eða annað sem veitir skjól. Ekki er mælt með því að hlaupa út, sérstaklega ef um einhverja vegalengd þarf að fara, þar sem erfitt er að fóta sig þegar allt er á hreyfingu.
Eftir jarðskjálftann verjið fætur með því að fara í skó.
Ef vatnslagnir hafa gefið sig skrúfið fyrir vatnsinntakið.
Ef gaseldavél er á heimilinu skrúfið fyrir gaskútinn þar sem möguleiki er á að samskeyti hafi farið í sundur.
Kveikið á útvarpi til að athuga hvort upplýsingar og tilkynningar komi þar fram.
Ef íbúar meta hús óíbúðarhæft skal fara út í rólegheitum, taka með sér það nauðsynlegasta og fara í næstu fjöldahjálparstöð.
Ef rafmagn fer af virka ekki þráðlausir heimasímar, eingöngu fastlínusímar og farsímar. Alltaf er hætta á að símkerfi laskist og að álag á þau verið mjög mikið. Notið því síma eingöngu í neyð fyrst á eftir.
Ef slys verður á fólki hringið í 112.
Hvaða tryggingar taka á jarðskjálftum?
Brunatrygging húseigna er skyldutrygging. Allt sem er brunatryggt er sjálfkrafa viðlagatryggt hjá Náttúruhamfaratryggingu Íslands sem þýðir að það er tryggt fyrir tjóni af völdum eldgosa, jarðskjálfta, skriðufalla, snjóflóða og vatnsflóða. Ekki er skylt samkvæmt lögum að tryggja innbú eða annað lausafé. Mikilvægt er að hver og einn meti sitt innbú og lausamuni og tryggi í samræmi við andvirði þess. Mjög algengt er að andvirði innbús sé vanmetið þegar tryggingar eru teknar.