Fréttasafn
|22.05.2019
Snarpar vindhviður óvinur húsbíla
Með hækkandi sól birtast húsbílar á ný eftir veturinn. Því miður eiga slysin sér stað á þessum ökutækjum líkt og öðrum og eru bakktjón þar algengustu. Önnur algeng tjón eru aftanákeyrslur, ekið á kyrrstæða bifreið t.d. við vegbrún og á bílastæðum, foktjón og þegar ekið er á umferðarmannvirki eða aðra hluti.
Þó bakktjónin séu algengust eru þau sjaldnast alvarleg. Það verða slysin aftur á móti þegar bíll fer utan vegar og spilar vindur þar oft inn í. Húsbílar taka mikinn vind á sig og eru dæmi um að kassar bílanna hreinlega splundrist þegar bíll hefur fokið útaf.
Til að auka öryggi sitt og sinna er gott að hafa eftirfarandi í huga á ferðum um landið í sumar:
Gæta að nægjanlegri hvíld fyrir ferð.
Hafa eldvarnateppi og virkt slökkvitæki, reyk- og gasskynjara til staðar.
Athuga vind og hviður áður en lagt er af stað.
Ef ekið er í miklum vindi, draga úr hraða eða stoppa og leggja upp í vindinn og muna að í 24 m/s vindi geta hviður farið í 30-35 m/s.
Tryggja að allir noti bílbelti.
Vera með athyglina við aksturinn.
Virða hámarkshraða og aðstæður hverju sinni.
Hafa nægt bil milli bíla.
Hægja á sér þegar bílar mætast á malarvegi m.a. til að minnka líkur á steinkasti.
Bakka í stæði frekar en út úr þeim og jafnvel hafa einhvern úti til að segja til.