Margir geta ekki hugsað sér að sumarið líði án þess að taka aðeins í stöng. Fjöldi skráðra og óskráðra veiðistaða eru ótelj­andi og auðvelt að gleyma sér við þessa iðju. Slys geta verið allt frá litlum atvikum upp í mjög alvarleg slys. Margt er hægt að gera til að koma í veg fyrir þau. Það er nú einu sinni þannig að slysin gera boð á undan sér, það þarf bara að þekkja og veita því athygli sem getur leitt til þeirra.

• Skoða umhverfið í kringum veiðistaðinn t.d. hvort þar séu gjótur, vara­samar brekkur eða steinar.

• Skoða veiðistaðinn sjálfan m.a. út frá dýpt, straumum og gerð botns.

• Nota höfuðfat með barði.

• Nota gler­augu með polaroid gleri og lokun til hliða.

• Spenna ávallt mitt­is­beltið á vöðl­unum.

• Setja gadda undir vöðlurnar ef botninn er sleipur.

• Nota vaðstaf til að kanna botn og auka stöð­ug­leika ef á að vaða.

• Vera í flot­vesti ef veitt er í straum­þungri á.

• Nota sólar­vörnina óspart.

• Hafa flugnanet meðferðis ef flugan verður aðgangs­hörð.

• Vera í fatnaði í mörgum lögum ásamt vel vind- og vatns­heldri skel.

• Vera með símann full­hlaðinn í vatns­heldum poka og hafa hleðslu­snúru og auka­hleðslu meðferðis.

• Taka gps, átta­vita, kort og flautu meðferðis, ef veitt er uppi á hálendi.

• Gæta vel að þeim sem eru í kring þegar kastað er.

• Muna að borða og drekka reglu­lega yfir daginn til að halda orku og hafa heita drykki meðferðis ef kalt er í veðri.

• Skilja ferða­áætlun eftir hjá traustum aðila.