Fréttasafn
|22.01.2025
VÍS hefur samstarf við Íslandsbanka
VÍS skrifaði í dag undir samstarfssamning við Íslandsbanka en rauði þráður samstarfsins er aukinn ávinningur viðskiptavina í vildarkerfum beggja félaga og enn betri fjármálaþjónusta. VÍS mun koma til með að bjóða upp á þjónustu í nokkrum af útibúum Íslandsbanka og verður sýnilegt í öllum dreifileiðum bankans: vef, appi og netbanka.
Guðný Helga Herbertsdóttir, forstjóri VÍS:
„Við erum ákaflega stolt af því að kynna þetta samstarf við Íslandsbanka. Með því stígum við stórt skref í að bæta upplifun viðskiptavina okkar en með því að sameina krafta okkar gerum við viðskiptavinum kleift að fá bæði fjármála-og tryggingaþjónustu á einum stað. Við hlökkum til að kynna útfærslur samstarfsins betur á næstu mánuðum og erum fullviss um að viðskiptavinir muni upplifa aukinn ávinning enda leggja bæði félög áherslu á framúrskarandi þjónustu.“
Jón Guðni Ómarsson, bankastjóri Íslandsbanka:
„Við erum mjög spennt að bjóða tryggingar sem hluta af vöruframboði Íslandsbanka og auka þjónustuna við okkar viðskiptavini. Við sjáum fjölmörg tækifæri í því að vinna með VÍS og nýta meðal annars fríðindakerfið okkar, Fríðu, sem er eitt öflugasta sinnar tegundar á landinu. Vegferðin með VÍS er einnig hluti af sókn bankans á nýju ári og hluti af nýrri stefnu hans. Þar er horft til frekari krosssölu og enn betri þjónustu. Við hlökkum því mjög til að sækja fram í samstarfi við VÍS.“
Nánari útfærsla verður kynnt á vormánuðum.