Skólar hefjast og umferðin þéttist

Þegar skólar hefjast að nýju eftir sumarfrí þéttist umferðin og fleiri börn eru á ferðinni. Mikilvægt er að gera ráð fyrir lengri ferðatíma, sýna þolinmæði og aka af sérstakri aðgát, ekki síst í nágrenni skóla og á þeim leiðum sem börn fara gjarnan til og frá skóla.

Margir grunnskólanemendur eru að hefja skólagöngu sína og hafa takmarkaða reynslu af umferðinni. Börn eru ekki alltaf með athyglina að fullu við umhverfið, geta tekið óvæntar ákvarðanir, hlaupið skyndilega yfir götu eða gleymt sér í leik. Því þurfa ökumenn að vera vel vakandi og ávallt búnir undir hið óvænta.

Við getum öll stuðlað að öruggari skólaleiðum:

Höfum athyglina alla við aksturinn og leggjum símann frá okkur.
Virðum hámarkshraða, sérstaklega nærri skólum, leiksvæðum og gangbrautum.
Stöðvum við gangbrautir og gefum vegfarendum nægan tíma til að komast yfir.
Sýnum gangandi og hjólandi vegfarendum ávallt tillitssemi.
Gerum ráð fyrir óvæntum ákvörðunum barna.
Munum að yngstu börnin geta horfið sjónum á bak við kyrrstæða bíla og gróður.
Forðumst að leggja þannig að skyggt sé á gangbrautir eða sýn ökumanna og barna.
Tryggjum að börnin séu sýnileg í umferðinni, til dæmis með endurskinsmerkjum og ljósum á hjólum eða hlaupahjólum.
Ræðum við börnin um örugga hegðun í umferðinni og förum reglulega yfir skólaleiðina með þeim.

Með samstilltu átaki getum við gert skólabyrjunina öruggari fyrir öll.

Fréttasafn

Deila frétt