Fréttasafn
|21.05.2026
Örugg hleðsla rafhlaupahjóla
Rafhlaupahjól hafa á skömmum tíma orðið algengur samgöngumáti enda bæði þægileg og umhverfisvæn. Mikilvægt er þó að hafa í huga að hætta getur skapast við hleðslu rafhlaðna þeirra. Slík atvik má oft rekja til gallaðra eða skemmdra rafhlaðna, rangs eða bilaðs hleðslubúnaðar eða óvandaðs búnaðar.
Við hvetjum þig því til að hafa eftirfarandi í huga til að fyrirbyggja bruna og bregðast rétt við ef eitthvað kemur upp á:
Hafa reykskynjara í rýminu þar sem hjólið er hlaðið.
Hlaða ekki hjólið nema einhver sé heima og vakandi.
Hlaða hjólið í hjólageymslu eða bílskúr ef kostur er.
Ekki hlaða hjólið í eða við flóttaleið.
Ekki hlaða hjól sem hefur orðið fyrir höggi á rafhlöðu nema fagaðili hafi skoðað það og staðfest að það sé í lagi.
Nota rétt og vottað hleðslutæki sem er óskemmt.
Gæta þess að hleðslutækið standi á hörðu undirlagi.
Hafa eldfim efni ekki nærri hjóli í hleðslu.
Taka hjólið úr hleðslu þegar rafhlaðan er fullhlaðin.
Taka varúðarmerki alvarlega, svo sem lykt, óvenjulegan hita, bólgna rafhlöðu eða óvenjuleg hljóð við hleðslu.
Ef eldur kviknar er öruggast að yfirgefa rýmið, loka hurð ef mögulegt er og hringja í 112.