Fréttasafn
|27.10.2026
Hrekkjavaka og öryggi barna
Þegar börn halda út í hrekkjavökuleiðangur er mikilvægt að huga að öryggi þeirra. Oft er dimmt úti og börn geta verið upptekin af búningum og nammi og því síður vakandi fyrir umferðinni.
Tryggjum sýnileika barna á Hrekkjavökunni
Með einföldum ráðstöfunum má auka öryggi þeirra.
Tryggið sýnileika. Notið endurskinsmerki og ljós svo börnin sjáist vel í myrkri.
Fylgið yngstu börnunum. Farið með þeim á milli húsa og tryggið að þau fari ekki ein yfir götur eða gatnamót.
Ræðið leiðina fyrir fram. Farið yfir hvaða götur börnin ætla að heimsækja og bendið þeim á hættur, svo sem fjölfarnar götur, blindhorn og staði þar sem skyggni er takmarkað.
Kennið örugga hegðun í umferðinni. Nota gangbrautir þar sem þær eru, líta í báðar áttir áður en farið er yfir götu og fara yfir hana í rólegheitum. Aldrei hlaupa út á akbraut, jafnvel þótt vinir eða nammi bíði hinum megin.
Gætið að búningum og fylgihlutum. Grímur mega ekki skyggja á sjónsvið og búningar eiga ekki að vera svo síðir að börnin geti dottið eða átt erfitt með að hreyfa sig.
Bílstjórar sýni sérstaka varúð. Ökumenn þurfa að aka varlega í íbúðahverfum, draga úr hraða og vera sérstaklega vakandi fyrir börnum sem geta hlaupið skyndilega út á götu.