• Forvarnaverðlaun VÍS voru afhent í 11 skipti á ráðstefnunni. Verðlaunin hlýtur það fyrirtæki sem þykir skara fram úr í öryggismálum og er öðrum fyrirtækjum góð fyrirmynd.
• Að þessu sinni hlaut sjávarútvegsfyrirtækið G.RUN forvarnaverðlaunin. G.RUN er rótgróið fjölskyldufyrirtæki sem sérhæfir sig í veiðum og vinnslu á bolfiski.
• Í upphafi árs 2019 opnaði fyrirtækið nýja og vel útbúna fiskvinnslu þar sem öryggismálin voru sett í fyrsta sæti. Fiskvinnslan er ein sú tæknilegasta á landinu og er með eitt öflugasta brunavarnarkerfi sem völ er á. Að auki er fiskvinnslan útbúin tæknilegum öryggis- og forvarnabúnaði. Aðbúnaður og öryggi starfsmanna er til mikillar fyrirmyndar og endurspeglar umhyggju fyrir starfsfólkinu.

• McRent er húsbílaleiga sem leigir bíla sína fyrst og fremst til erlendra ferðamanna. Það er mikil áskorun fólgin í því að fræða erlenda gesti um aðstæður á Íslandi, vegakerfi og veðurfar.
• McRent er með skýra sýn á öryggismál og afhendir ekki viðskiptavinum lykla af bílnum fyrr en búið er að fara yfir hvert viðkomandi ætlar að fara, helstu mögulegar hættur sem geta orðið á leið hans þ.m.t. hættulega vindastaði.
• Ökutæki McRent eru mjög snyrtileg og tryggt er með reglubundnu viðhaldi að þau séu eins örugg og kostur er.

Elfa Þöll Grétarsdóttir, sérfræðingur í hjúkrun hjá Landspítala

Rannsóknarniðurstöður rekja kulnun til þriggja orsakaþátta; a) eiginleika einstaklinga, b) tækninýjunga og c)starfsumhverfis (stjórnunarhættir, vinnustaðamenning, eðli starfs og álag).

Niðurstöður rannsókna sýna að af þessum þremur þáttum hafa eiginleikar starfsumhverfis mesta forspárgildið um tíðni kulnunar. Þrátt fyrir þessar niðurstöður er mesta áherslan í viðbrögðum gegn kulnun á vinnustað lögð á einstaklinginn. Í almennri umræðu eru einstaklingurinn, tækninýjungar og lífsgæðakapphlaup talin helstu orsakir kulnunar. Almennt er þáttur aðstæðna vanmetinn og því ekki ráðist á rót vandans.

Þessi nálgun hunsar möguleg sóknarfæri til forvarna, er samfélaginu dýr og leggur auk þess ábyrgðina á herðar þolanda í skaðlegu umhverfi.

Í erindinu verður fjallað áhrif umhverfis á vinnustöðum á heilsu og rök færð fyrir mikilvægi þess að greina aðstæður og að laga vinnustaðina, en ekki einstaklingana sem vinna þar.

Magnús S. Þorsteinsson, forstjóri Blue Car Rental

Að tryggja umferðaröryggi ferðamanna er krefjandi verkefni sem hvílir á herðum margra, þá sérstaklega bílaleigna. Þegar að óhöppin gerast er algengasta umfjöllunarefni að upplýsa þurfi ferðamenn betur.

Síðustu 10 ár hefur verið gríðarleg bylting í upplýsingagjöf til ferðamanna. Það er mikill hagur bílaleigna að tryggja öryggi viðskiptavina sinna og koma fróðleik og upplýsingum áleiðis til ferðamanna. En hver er besta leiðin til að koma þessum skilaboðum áleiðis og útskýra alvarleika málsins?

Þrátt fyrir vel upplýsta ferðamenn, öruggustu bíla landsins, ótæmandi gagnagrunn af góðu forvarnaefni og áróður við afhendingu eru slysin enn að gerast. Þau munu halda áfram að gerast á meðan að aðstæður eru óöruggar.

Jón Viðar Matthíasson, slökkviliðsstjóri Slökkviliðs höfuðborgarsvæðisins

Lög og reglugerðir sem fjalla um hönnun, byggingu og rekstur mannvirkja eiga eitt sameiginlegt markmið en það er að vernda líf og heilsu manna, eignir og umhverfi. Því markmiði er m.a. náð með því að tryggja faglegan undirbúning mannvirkjagerðar og virkt eftirlit eiganda og opinberra aðila með því að kröfum um öryggi mannvirkja og heilnæmi sé fullnægt á líftíma mannvirkisins.

Í lögunum er einnig fjallað um hver beri hvaða ábyrgð til að ná þessu markmiði. Ábyrgð okkar þ.e.a.s. eiganda mannvirkis, eldvarnaeftirlits slökkviliða sem opinbers aðila og tryggingafélaga er einnig mjög skýr og fellur að því að uppfylla sama markmið.

Spurningin er hvort við séum að virða leikreglurnar sem tengjast mannvirkjum frá hönnunarstigi til niðurrifs. Í raun er enginn skortur á góðum fyrirmælum og leiðsögn heldur kannski frekar á einbeittum vilji að fara eftir þeim og hættan að gleyma sér ekki í dagsins önn. Hvað segir reynslan okkur?