Nú er frost á fróni

Reynsla VÍS sýnir að í frosti eins og hefur verið undanfarið og verður eitthvað áfram getur verið hætta á að frjósi í lögnum sumarhúsa og í loftræstikerfum fyrirtækja. Til að auka á þessa hættu eiga sumar veitur fullt í fangi með að anna eftirspurn á heitu vatni á sínu svæði. Vegna þessa viljum við hvetja sumarhúsaeigendur, sér í lagi þá sem eru með upphituð hús og umsjónarmenn fasteigna hjá fyrirtækjum þar sem eru loftræstikerfi að fylgjast með húseignum sínum.  

Skoða þarf hvort þokkalegur hiti sé í húsinu, hvort nægt rennsli sé á vatni og þrýstingur eðlilegur á mæli lagnagrindar. Gott er að skilja vaskaskápa eftir opna sérstaklega ef þeir eru á útvegg og tryggja að skrúfað sé fyrir neysluvatnið og lagnir þeirra tæmdar þegar hús er yfirgefið. Eins er gott að hafa öryggiskerfi sem lætur vita ef breyting verður á hita og raka innandyra.

Ef eitthvað er ekki eins og á að vera er mikilvægt að finna rót vandans. Ef kalda vatnið hefur frosið getur hjálpað að láta heita vatnið renna í einhvern tíma. Annars þarf að finna út hvar frosið er og hita upp það svæði. Ef ekkert gengur til að koma vatni aftur á verður a.m.k. að skrúfa fyrir neysluvatnið áður en húsið er yfirgefið.